Ata ishin dikur bashkëthemelues të partisë LIBRA, mirëpo kur Mimoza Hafizi i propozoi që partia të kishte dy krerë, Ben Blushi i dërgoi disa e-maile ku e quante hileqare dhe i uronte pleqëri të mbarë.
Por duket se gjërat nuk kanë përfunduar këtu pasi bashkëshorti i Mimozës, Hasan Hafizi ka paditur në gjykatë partinë LIBRA.
Hafizi i cili është pronar i kompanisë së ndërtimit të rrugëve “Albavia”, i është drejtuar me një kërkesë-padi gjykatës së Shkallës së Parë Tiranë, ku kërkon prej Libra-s 25 milionë lekë (të vjetra), si dhe bllokimin e financave.
Politiko.al ka siguruar dokumentin e kërkesë-padisë së Hafizit, ku bie në sy fakti se kontrata nuk është nënshkruar mes tij dhe LIBRA-s, por ndërmjet biznesmenit Hafizi dhe pronarit të ndërtesës ku është strehuar partia politike për disa muaj.
Politiko shkruan se ka kontaktuar edhe me përfaqësues të partisë, por ata kanë thënë se 25 milionët që kërkon z. Hafizi janë kontributi i tij vullnetar për partinë, në të cilën në atë kohë bënte pjesë si bashkëthemeluese bashkëshortja e tij, Mimoza Hafizi.
Kujtojmë se Ben Blushi ka hequr dorë nga drejtimi i LIBRA-s dhe aktualisht drejton televizionin Top Channel, ndërsa thuhet se partinë tashmë e drejton një njësi e quajtur ‘Bërthama’.
