Bëri bujë të madhe disa ditë më parë rasti i 47-vjeçarit Ardian Kallami i cili u gjet i vetëvarur në banesën e tij.
Ngjarja e rëndë ndodhi më 28 maj në Vaun e Dejës, kur Kallami kishte dëshmuar në komisariat për vjedhjen e banesës së komshiut ngjitur me banesën e tij.
Sipas familjarëve, efektivët e policisë në Vaun e Dejës e kishin dhunuar të ndjerin dhe e kishin detyruar të pranonte një krim që nuk e kishte bërë dhe pikërisht kjo ishte arsyeja pse ai i dha fund jetës në mënyrë tragjike.
Menjëherë pas kësaj ngjarje u shkarkua nga detyra shefi i komisariatit të Vaut të Dejës Paulin Çupi dhe dy efektivëve të tjerë policie, ndërkohë që u vunë nën hetim 9 të tjerë.
Një deklaratë e nënshkruar me firmën e tij ku pranonte krimin e vjedhjes, qarkulloi në media.
Në lidhje me vdekjen në mënyrë misterioze të të atit, ka reaguar e bija e viktimës, Romina Kallami.
Ajo deklaroi se i ati i kishte treguar gjithçka në lidhje me dhunën dhe ndodhej në gjendje depresive.
Tashmë Romina Kallami i është drejtuar me një letër të gjitha mediave ku deklaron se ajo dhe familja e saj nuk pranojnë më abuzime mediatike.
E bija e 47-vjeçarit shkruan që familja e saj nuk akuzon shefin e komisariatit të Vaut të Dejës, Paulin Çupin dhe efektivët e pezulluar.
Në fund të letrës shkruhet se gjithçka i është lënë në dorë drejtësisë.
