Foto ilustruese
Shtatzënitë e padëshiruara ndodhin shumë shpesh në vendin tonë, sidomos mes të rinjve të cilët nuk i vënë veshin këshillave të mjekëve për mbrojtje gjatë marrëdhënieve seksuale.
Për këtë shkak ndodhin edhe shumë aborte të cilat sipas statistikave në vendin tonë arrijnë deri në 17.2 aborte për 100 lindje.
Ndërprerja e këtyre shtatzënive bëhet deri në 22 javë që do të thotë afërsisht deri në muajin e pestë të barrës.
Por sipas mjekut obstetër-gjinekolog Bajram Balliu i cili jep alarmin, medikamentet në vend jepen nga shumë farmacistë të papërgjegjshëm pa këshillën e mjekut. Sipas mjekut, këto medikamente që hyjnë në vendin tonë janë të palicencuara e në shumë raste jeta e gruas ka qenë në rrezik për shkak të hemorragjisë së theksuar.
Balliu më tej tregon të gjitha komplikacionet që vijnë si pasojë e abortit e u bën thirrje gjithë femrave që duan të kryejnë një procedurë të tillë, që të drejtohen pranë materniteteve apo klinikave të licencuara e të bëjnë paraprakisht të gjitha ekzaminimet e nevojshme.
Balliu ka rrëfyer në një intervistë për GSH.al:
Ka dy mënyra për të kryer abortin që janë metoda medikamentoze dhe ajo kirurgjikale (me vacuum aspirator, kyretazh). Metoda medikamentoze kryhet vetëm nëse mosha e barrës është më pak se 49 ditë. Duhet theksuar se në praktikën e përditshme, hasim shpesh komplikacione të shumta nga përdorimi i këtyre medikamenteve (të palicensuara në vendin tonë).
Medikamentet për abort merren në farmaci pa këshillën e mjekut dhe përdoren. Pastaj pacientja vjen në maternitetin tonë me hemorragji të shprehur. Kemi pasur raste kur është rrezikuar jeta e gruas nga përdorimi i këtyre kokrrave. Ka farmacistë të papërgjegjshëm që rekomandojnë përdorimin e këtyre kokrrave. Dua t’u bëj thirrje pacienteve që të mos marrin asnjëherë ilaçe në farmaci pa u konsultuar me mjekun.
Theksoj edhe njëherë që vetëm mjeku obstetër-gjinekolog ka për detyrë që të përcaktojë nëse aborti mund të kryhet me medikamente, kuptohet duke qenë pacientja nën mbikëqyrjen e mjekut. Kundërindikacionet janë: sëmundjet e rënda kardiovaskulare, të mëlçisë, veshkave dhe mushkërive, anemia (Hb nën 10), shtatzënia jashtë mitre, alergjitë, fibromyoma e përmasave të mëdha, hemorragjia uterine e padiagnostikuar etj."
