Shumë qytetarë shqiptarë kanë ngritur jo rrallëherë shqetësimin lidhur me transferimin e produkteve dhe mallrave të ndryshme nga vendet e ndryshme drejt Shqipërisë dhe anasjelltas. Por, pse ndodh që porosia e dërguar të vonojë ose të mbahet peng diku dhe të mos përfundojë kurrë në destinacionin final? Duke qenë se Posta Shqiptare ka monopolin e këtyre transfertave ndoshta e shfrytëzon këtë luks duke vendosur tarifat në bazë të interesave që i sheh më të leverdishme.
Gjithsesi, nuk është vetëm Posta ajo që përfshihet në trasferta pasi një rol kyç e ka edhe Dogana Shqiptare, e cila jo rrallëherë bllokon pakot për arsye të ndryshme, ku shumica e rasteve është një tarifë plus që e vendos ky institucion.
Një qytetar shqiptar ka shkruar pranë JOQ për ta ngritur këtë si shqetësim, pasi tarifa e transfertës është paguar njëherë në Amerikë, por Dogana Shqiptare në bashkëpunim me Postën Shqiptare i ka vendosur një tarifë goxha të madhe për tërheqjen e pakos.
