Të gjithë ata që kanë bërë qoftë edhe një ditë plazh në Vlorë, duhet ta njohin burrin e “Kokoshka Dashurie”. Ai është një njeri si gjithë të tjerët, që sfidon diellin dhe të nxehtin çdo verë dhe udhëton plazh më plazh në Vlorë e shet kokoshka.
Kokoshkat e tij janë të veçanta, pasi siç thotë edhe ai “kanë shumë dashuri brenda”. Sa e sa çifte janë lidhur e më pas janë martuar vetëm pasi i kanë bashkuar “kokoshkat e dashurisë” së Beqir Sadikut.
Në fakt, të paktë janë ata që ia dinë emrin Beqirit, pasi pjesa më e madhe e identifikon me kokoshkat që shet. Ai ka disa kohë që nuk është shfaqur, e veçanërisht këtë verë na ka munguar të gjithëve. Beqiri u përplas nga një makinë dhe pësoi dëme të shumta në trup, të cilat ia venitën fuqitë.
Në qytetin bregdetar pati edhe “gojëdhëna” se Beqiri i “kokoshkave të dashurisë” nuk arriti të mbijetonte, por ja që sot ai është shfaqur në gjendje të mirë në një video live të bërë nga faqja “Vlora”.
E shikojmë edhe një herë në dimër burrin e famshëm të “Kokoshkave të dashurisë” dhe shpresojmë që verën e ardhshme të jetë sërish mes nesh në plazh, sikurse çdo vit tjetër!
