Vdekja e 27-vjeçarit shqiptar Refik Mata në një burg francez vijon të mbetet e pazbardhur plotësisht për familjarët e tij. Bekim Mata, vëllai i tij është në kërkim të drejtësisë pasi kanë dyshime se vdekja e tij nuk ka qenë vetëvrasje ashtu siç është raportuar. Duke folur për "FaxNews", Bekimi rrëfeu bisedën e fundit me të vëllanë, arsyen e dënimit, sherrin e disa muajve më parë në burg dhe heshtjen e autoriteteve. Bekim Mata, i cili jeton me prindërit në Itali, ka kryer disa udhëtime drejt Francës për të zbardhur ngjarjen e rëndë.
Ai iu është drejtuar autoriteteve franceze dhe shqiptare për të marrë më shumë informacione, por ende nuk ka gjetur zgjidhje. Ai thotë se familja e tij ende nuk ka siguruar procesverbalin mbi autopsinë e të riut që përcakton shkakun e vdekjes. Ai ka treguar dhe për seancën ku Refiku kërkoi të ekstradohej në Shqipëri, por kërkesa iu refuzua dhe në këtë seancë ai u shfaq me shenja dhune në trup. Refiku i kishte rrëfyer vëllait të tij se shenjat e dhunës i kishte pasi ishte dëmtuar gjatë një përplasje mes të dënuarve në burg. Bekimi thotë se vëllai është dënuar me 5 vite burg për vjedhje, ndërsa nuk ka informacion se si është përfshirë në këtë veprimtari.