Me të mbyllur vendvotimet simpatizantët partiakë u harbuan në festat e partive të tyre. Në ambiente të hapura dhe të mbyllura ende pa u shfaqur rezultatet zyrtare, secila parti shpalli fitore. Ky ishte motivi për tubimin e qytetarëve, të cilët nuk respektuan asnjë masë antikovid, as distancën apo bartjen e maskave. Përkundër rekomandimeve dhe masave ndëshkuese për mos respektim të protokolleve, të gjithë harruan se virusi korona është ende mes nesh. Festa masive e BDI-së ishte në Strugë, për balotazhin e Merkos.

Disa festonin fitore, të tjerët balotazhe, por kishte të tillë që edhe humbje. Një gjë ishte e përbashkët, rreziku potencial për përhapjen e CoVid-19. E tillë ishte edhe festa e Koalicionit ASH-AAA në Gostivar për balotazhin e Taravarit.

VMRO-DPMNE në shtabin qendror gjatë pres konferencës pati grumbuj simpatizantësh, të cilët përpos mos respektimit të masave, nuk u kursyen as surle e tupanë.

Nuk e la mangët as LSDM-ja, i madh e i vogël iu bashkuan festës në pothuajse në të gjitha qytetet.

Reagimet e mjekëve janë të pareshtura lidhur me mos respektimin e masave anti kovid. Epidemiologët pa dashur të prononcohen në media, thonë se numri i infektimeve mund të rritet ndjeshëm. Ndonëse shprehen të gatshëm për ballafaqim me një valë të re të pandemisë, revolta e tyre gjatë gjithë fushatës parazgjedhore ka arritur kulmin me festat e mbrëmshme politike.