Mbrëmja e djeshme do të mbahet mend gjatë nga boksieri shqiptar Florian Marku, i cili falë triumfit ndaj kundërshtarit ukrainas Maxim Prodan, arriti të shpallej kampion bote në IBF për peshat e mesme. Suksesi i jashtëzakonshëm i tij u përjetua dhe u festua nga çdo shqiptar anembanë botës. Por si e nisi karrierën Florian Marku? Në një rrëfim të dy viteve më parë, ai shprehej se në moshë 8-vjeçare është larguar bashkë me familjen drejt Greqisë. në moshën 18-vjeçare është përfshirë në një sherr me disa rusë dhe më pas është kthyer në Shqipëri. Më pas ai u largua drejt Austrisë për të vijuar karrierën. Florian Marku ka prejardhjen nga Kosova, pasi gjyshi i tij ka lindur në Kosovë.
Ai më pas është larguar për në Shqipëri, në Lushnjë për shkak të regjimit komunist. Por, pas viteve 90’, familja e Markut u zhvendos në Selanik të Greqisë. Florian Marku ka bërë edhe burg në Greqi. Madje një pjesë të vogël e kaloi edhe në burgun e Austrisë. Karrierën Marku e nisi në Kick-box, ndërsa ëndërr kishte përballjen me Conor McGregorin. Në karrierën e tij, Marku numëron nëntë fitore dhe një barazim.
Dy vite më parë Marku shprehej:
Arrestimi në Austri.
”Një ditë para ndeshjes. Sapo shkova në shtëpi, në Linz, erdhën e më arrestuan. Të nesërmen, unë kisha ndeshjen, por Interpoli i Austrisë, në bashkëpunim me Interpolin grek, pas informacionit të marrë nga Greqia për vendndodhjen time, më arrestuan në Linz. Më erdhi keq se isha në kulmin e karrierës. Nuk e prisja të më ndodhte kjo. Isha mjaft i njohur në Austri. Nuk më del nga mendja kur polici më tha: “Po ti çfarë bën këtu, unë kam prerë biletën për të parë ndeshjen? Kjo më kushtoi një vit e gjysmë jashtë ringut sa edhe fansat kujtuan se s’do rikthehesha"- shprehej Marku.