Emigrimi i fëmijëve të mitur është një fenomen që vazhdon të përhapet gjithmonë e më shumë. Nga dëshira e tyre dhe e prindërve të tyre fëmijët largohen nga Shqipëria për një jetë më të mirë në vendet e Europës dhe jo vetëm. Por rruga e largimit është shumë e vështirë, me kosto të lartë dhe me një rrezik të madh. Italia është një ndër vendet e preferuara për fëmijët e mitur dhe sipas mediave italiane 120 fëmijë shqiptarë të moshës 14 deri në 17-vjeç ndodhen në Torino. Por pasi nisen nga prindërit e tyre për të mbërritur në Itali, disa prej këtyre fëmijëve humbin kontaktet dhe sipas hetuesve rrëmbehen nga organizata kriminale.
Pas rrëfimit të një fëmije të mitur i cili deklaroi se prindërit e kishin nisur në Itali për t'u takuar me një të afërm që se kishte parë asnjëherë, policia filloi një hetim. Ky hetim përfundoi disa ditë më parë me akuza të rënda kundër 60 të huajve (kryesisht shqiptarë) që jetojnë në Torino dhe të cilët tani mund të rrezikojnë dënime deri në 11 vjet burg. Autoritetet policore treguan se ishin kontaktuar nga familjarët e të miturve, të cilët kishin treguar se të afërm të tyre në Itali u kishin ofruar mundësinë të strehonin dhe kujdeseshin për fëmijët e tyre.
Por pastaj, pas largimit, për disa prej tyre nuk është marrë asnjë lajm, asnjë informacion mbi fatin e fëmijëve. Dhe njëjtë si fëmijët janë ‘zhdukur’ edhe të afërmit, duke u pamundësuar familjarëve marrjen e një përgjigje për fatin e të miturve. Sidoqoftë, sado të pabesueshme të jenë këto histori, ato duket se janë vetëm maja e ajsbergut që fsheh një trafik vajzash dhe djemsh jo vetëm në Itali, por edhe në vendet e tjera evropiane dhe Lindjen e Mesme. Një trafik me të cilin merren sot departamentet speciale hetimore të Europol dhe Interpol.
Burimi:cronacaqui Përktheu dhe përshtati:JOQ ALBANIA