Nuk është hera e parë që në ambientet e jashtme të QSUT-së qytetarët përfshihen në sherr dhe përplasje me njëri-tjetrin për shkak se nuk gjejnë dot vende për parkimin e makinave. Prej ditësh lejimi i hyrjes së një numri mjetesh më të madh se kapacitetet e parkimit është kthyer në një situatë të zakonshme në QSUT. Gjithashtu edhe ambulancat ndodh që bllokohen në trafik, teksa tranportojnë me urgjencë të sëmurë. Dritan Xhemali, menaxher projekti në QSUT pranon problematikën por thotë se zgjidhja nis nga disiplinimi i shoferëve, raporton Ora News. "I bëj thirrje qytetarëve që të mos hyjnë kur nuk e kanë shumë të nevojshme në QSUT sepse shkaktojnë kaos dhe pengojnë autoambulancat duke ndikuar në trafikun e rënduar. Jemi përpjekur por ne nuk mund t'i ndalojmë ata të hynë. Ne i sqarojmë që vende parkimi nuk ka dhe trafiku është i rënduar por nuk mund t'i ndalojmë sepse thonë jemi me të sëmurë brenda dhe duan t'i çojnë. Është e pamundur t'i ndalojmë"- shprehet ai.
Kujtojmë se QSUT ka 1200 vende për parkime, por aktualisht janë aktive 900 vende, pasi pjesa tjetër është zënë nga spitalet Covid 1 dhe Covid 3 për shkak se kanë vendosur kufizime në oborr për të respektuar rregullat anti-Covid.
