Detaje të reja janë bërë me dije në lidhje me vrasjen e 23-vjeçares Sabrina Bengaj nga i shoqi Elton Meta në Fier. Tch ka publikuar një pjesë të deklaratës së Sabrinës 8 muaj më parë kur u nda nga bashkëshorti i saj. Ajo rrëfente se shkak për ndarjen ishte bërë shoqërimi i Eltonit me një vajzë dhe disa fotove të publikuara në Facebook me të si dhe disa sjelljeve "patriarkale" të tij.
“Me kalimin e kohës Eltoni nuk më lejonte të vazhdoja shkollën dhe të punoja , pasi ishte me mendime patriarkale. Duke qenë në moshë të re i jam nënshtruar dhunës psikologjike dhe fizike të të paditurit. Në datën 17 shtator 2020 pashë disa foto të tij në "Facebook", të shoqëruar me një vajzë tjetër, u trondita nga sjellja e tij, mora vajzën dhe u largova në shtëpinë e prindërve"- shprehej Sabrina në kohën kur kërkoi të ndahej me të.
Por në seancën gjyqësore, Elton Metaj ka insistuar se nuk donte të ndahej dhe se e donte Sabrinën. Pas refuzimit të saj për të vazhduar më tej lidhjen, Eltoni i ka shkuar në shtëpi dhe i ka kërkuar të kthehen sërish bashkë. Pas kanosjes në shtëpinë e Sabrinës, policia ka mbërritur në vendngjarje dhe e ka arrestuar Eltonin. Por në korrik ai doli nga burgu i Zaharisë dhe vetëm pak ditë më parë vrau ish-gruan me të cilën kishte një vajzë.
