Lea Rusha, 48-vjeçari shqiptar i cili ishte dënuar me burgim të përjetshëm për grabitjen më të madhe në historinë e Britanisë është liruar pas 15 vitesh burg. Në vitin 2006, Rusha në bashkëpunim me shqiptarë të tjerë dhe jo vetëm sulmuan një menaxher banke dhe u larguan me 53 milion paund duke shënuar grabitjen më të madhe në Britani dhe të dytën në të gjithë botën. Në shkurt 2006, Colin Dixon, menaxheri i depove të parave të Securitas në Vale Road, Tonbridge u rrëmbye nga një bandë e pamëshirshme që po kryente atë që do të bëhej vjedhja e dytë më e madhe e parave në botë.
Hajdutët ishin të armatosur me pistoleta dhe kallashnikov model ASH 82, prodhim shqiptar. Ata neutralizuan 14 rojat e armatosura të depozitës. Ndonëse e mbushën plot një kamion ‘Renault’, një veturë ‘Volvo’ dhe një ‘Vectra’, banditët arritën të merrnin vetëm 53 milionë stërlina duke lënë në depo 150 milionë stërlina të tjera, sepse kamioni kishte kapacitet vetëm 7,5 tonë
Stuart Royle, Roger Coutts, Lea Rusha dhe Jetmir Bucpapa u dënuan me burgim të përjetshëm për pjesën e tyre në grabitjen e depove Securitas pas një gjyqi në 2007. Emir Hysenaj gjithashtu u dënua me 20 vite burg, ndërsa ish -luftëtari i arteve marciale të përziera Lee Murray u dënua më vonë me 25 vjet burg. Sipas mediave britanike të paktën 36 arrestime u bënë gjatë hetimit të gjerë të policisë.