Policia në Kanada po kërkon një burrë për të cilin dyshojnë se goditi një infermiere në fytyrë, pasi i vaksinoi gruan, pa pëlqimin e tij. Burri u përball me infermieren të hënën në mëngjes në një farmaci në Sherbrooke, në juglindje të Montrealit, Quebec, ku ajo kryente procesin e vaksinimit.
"I dyshuari hyri direkt në farmaci dhe filloi t'i bërtiste infermieres," tha zëdhënësi i policisë Martin Carrier për agjencinë e lajmeve Reuters.
Ai shtoi se burri ishte i shqetësuar se vaksina i ishte injektuar gruas së tij "pa autorizimin e tij" dhe vazhdoi të godiste infermieren në fytyrë. Nuk ishte e qartë nëse i dyshuari kundërshtonte vaksinimin në përgjithësi, apo thjesht nuk donte që gruaja e tij të vaksinohej në atë farmaci.