Janë bërë publike dëshmitë e të mbijetuarve nga aksidenti tragjik i ndodhur në Kroaci, ku mbetën të vdekur 10 shqiptarë të Kosovës. Ramë dhe Kada Gashi janë dy prej të mbijetuarve, të cilët kanë rrëfyer momentet e tmerrit për median kroate “Jutarnji List”. Ai i kishte kërkuar bashkëshortes së tij të udhëtonin me avion, por ajo kishte këmbëngulur të merrnin autobusin.
“Udhëtimi ishte i këndshëm, madje argëtues, dhe ne ramë në gjumë vetëm rreth orës 05:00, sepse ishin disa të rinj që kënduan dhe u gëzuan gjithë natën. Sapo kisha fjetur dhe papritmas dëgjova si disa të shtëna që më zgjuan. Për një sekondë gjithçka u kthye në tmerr. Sapo pashë veten duke fluturuar poshtë, sendet po binin mbi ne, ulëset ishin thyer, njerëzit po shtrëngonin duart e tyre, unë papritmas kuptova se një grua poshtë meje kishte vdekur. Pastaj po kërkoja gruan time dhe kur e gjeta dola dhe ndihmova të tjerët. Sepse isha mirë fizikisht dhe shpejt e kalova tronditjen fillestare, duke u ardhur në ndihmë të tjerëve”,- rrëfen ai.
Gruaja e tij dhe ai udhëtuan nga Mannheim, dhe destinacioni i tyre i fundit ishte Mitrovica. Ata po vinin për pushime. “Unë as që doja të shkoja, por ajo më tha se do të merrnim autobusin. Doja me avion, sepse fluturimi ynë nga Shtutgarti në Prishtinë do të zgjaste 1 orë e gjysmë, por ajo këmbënguli që të shkonim me autobus. Këtë nuk do ta harroj kurrë”,-përfundon Gashi.
