I mbijetuari i aksidentit tragjik të ndodhur ditën e sotme në “Slavonski Brod”, në Kroaci ka treguar tmerrin e përjetuar. Fidan Hajdari ka thënë se në momentin kur ndodhi aksidenti kishte qenë në gjumë dhe se gjithçka kishte ndodhur shumë shpejt.
“Vetëm kam udhëtu, nuk e kam pas askënd të familjes. Rasti ka ndodhur në 6 në mëngjes, shumica kemi qenë në gjumë, ka ndodhur një aksident shumë i shpejtë. Arsyet e aksidentit është mirë me i dhënë policia, unë për vete kam qenë në gjumë nuk mund të supozojë”,-ka thënë Hajdari.
Ndërkohë, mes lotësh ai tregon se disa nga trupat e viktimave i kishin larguar vetë, ndërsa shtoi se pamjet ishin shumë të rënda.
“Më ka dalë gjumi, e kam pa që jemi duke u përplasur por se kemi pritur që ka me qenë kaq tragjike. Fati që kemi shpëtuar shumica, fati i keq është që 10 prej neve nuk ia kanë dalë. Kam qenë në pjesën e mesme të autobusit në katin e sipërm. Po, shumicën prej tyre i kemi largu vetë trupat. Autoritetet kroate i kisha falenderu kanë bërë një punë shumë të mirë.”-shtoi ai.