Kryeministri i Kroacisë, Andrej Plenkovic, ka thënë se qeveria që drejton ai dhe të gjitha shërbimet tjera në këtë shtet do të bëjnë gjithçka që munden për të ndihmuar të plagosurit, pas aksidentit të frikshëm të një autobusi me targa të Kosovës në Kroaci. Kujtojmë se si pasojë e aksidentit tragjik humbën jetën 10 persona, ndërsa mbi 40 të tjerë mbetën të plagosur. Ndër të tjera, Plenkovic ka bërë me dije se aktualisht vetëm një person është duke u trajtuar në Zagreb, ndërsa të tjerët në spital në Sllavonski Brod.
“Unë përsëri shpreh ngushëllimet e mia për familjet e atyre që humbën jetën në këtë aksident të tmerrshëm, ndërsa të gjithë atyre që janë plagosur u është siguruar ndihma urgjente mjekësore. Të gjitha shërbimet përkatëse janë në terren dhe ne do të ndihmojmë në çdo mënyrë që mundemi”,-ka thënë Plenkovic përmes një postimi në llogarinë e tij në “Twitter”.
Ndërkohë, duke publikuar fotografi nga spitali në Sllavonski Brod, ai ka thënë se përveç ndihmës mjekësore, autoritetet kroate do të organizojnë kthimin e secilit person në Kosovë.