Detaje të reja kanë dalë në dritë në lidhje me aksidentin tragjik të ndodhur ditën e sotme në autostradën “Slavonski Brod” në Kroaci, ku një autobus me targa të Kosovës doli nga rruga dhe për pasojë 10 pasagjerë humbën jetën. Fillimisht ishte e vështirë për t’i identifikuar, ndërsa disa orë pas tragjedisë policia arriti të bënte lidhjen e viktimave me dokumentet e tyre.
“Ishte e dhimbshme për të parë lotët dhe për të dëgjuar britmat e familjarëve të personave që vdiqën në aksidentin e sotëm. Ata mbërritën në spital pasditen e së dielës për të identifikuar të dashurit e tyre.”-shkruan mediumi kroat, Jutarnji.hr.
Në deklaratën e Policisë është përshkruar se si autobusi me 67 pasagjerë dhe dy shoferë doli nga autostrada, ndërkohë që 14 persona i mbijetuan pa lëndime të rënda aksidentit të frikshëm. Kujtojmë se Presidentja e Kosovës, Vjosa Osmani e ka shpallur të hënën “ditë zie”, në nder të viktimave të tragjedisë në Kroaci.
