Personat që nuk janë lënduar nga aksidenti me fatalitet që ndodhi mëngjesin e sotëm në Kroaci, janë akomoduar në “Antonio Guesthouse” në Kroaci.
14 personat që shpëtuan pa ndonjë lëndim nga aksidenti i sotëm, i ka kapluar heshtja. Secili që vie, mundohet të lajmërojë familjarët në Kosovë dhe Gjermani se kanë shpëtuar dhe se tani mund të festojnë ditëlindjen e tyre të dytë.
Nga aksidenti i sotëm i autobusit në Kroaci, prej 62 pasagjerëve, 10 kanë vdekur ndërsa 45 janë lënduar, ku 15 prej tyre janë me lëndime të rënda.
Por, shoku që ka goditur pasagjerët që i shpëtuan këtij aksidenti dhe trauma psiqike, do të jetë në mendjet e tyre për të gjithë jetën dhe e vështirë për t’u shpjeguar.
Duke ngrënë ushqim dhe i përlotur, një i ri që udhëtonte i vetëm në autobusin e aksidentuar e tregoi përvojën dhe përshkrimin e tij të aksidentit.
“Ne që ishim në pjesën e sipërme të autobusit nuk pësuam lëndime, por ata që ishin poshtë… ishte një masakër e vërtetë. Pothuasje të gjithë pasagjerët ishin duke fjetur në orën 6 të mëngjesit. Ende nuk e kam të qartë se si një tragjedi kaq e madhe mund të ndodhte. Gjëja e parë që mbaj mend pasi u zgjova nga rrotullimi, ishte mendimi se jemi rrotulluar por se nuk ishte ndonjë aksident i madh. Në ato moment, nuk e mendoja se mund të ishte diçka shumë tragjike, por ja që ishte. Ne kemi ndihmuar të nxjerrim trupat e pajetë nga autobusi. Gjeta edhe mundësinë të lajmëroj familjen, të gjithë ishin të gëzuar”, ka deklaruar për SBplus, Fidan Hajdari, i riu i cili jeton dhe punon në Gjermani.
Ai ka falënderuar policinë kroate dhe stafin profesional mjekësor për gjithçka që kanë bërë për t’i ndihmuar të aksidentuarit.