Plagosja e 5 besimtarëve myslimanë në xhaminë "Dine Hoxha" në Tiranë, tronditi mbarë opinionin publik shqiptar dhe jo vetëm. Mediat shqiptare, por edhe të huaja “bombarduan” rrjetin duke transmetuar ngjarjen, ku Rudolf Nikolli autori i plagosjes me thikë qëlloi besimtarët në ambientet e xhamisë. Ndërkohë, pak më parë është bërë me dije se autori i ngjarjes që ndodhi gjatë muajit të Ramazanit dhe shumë në atë kohë e cilësuan si një veprim terrorist, për shkak të kohës dhe mënyrës sesi ndodhi, i ka shpëtuar burgut.
Kjo për shkak se prokurori Hysni Mulaj ka vendosur të mos kërkojë burg për Rudolf Nikollën. Raportohet se Prokurori i çështjes ka mbyllur hetimin, duke e quajtur autorin një të “sëmurë mendor”, ndërsa ka kërkuar për të vetëm mjekim për shkak të gjendjes së tij mendore.
Mirëpo, nga ata që nuk e kanë “kapërdirë” lehtë këtë vendim është edhe Imami Ahmed Kalaja. Kujtojmë se ky i fundit, ditën e djeshme përmes një postimi në llogarinë e tij të “Instagram” tregoi haptazi se është kundër lirisë së autorit, ndërsa theksoi se nëqoftëse i shpëtonte burgut Nikolli, ky i fundit do të përbënte rrezik për qytetarët.
Ndërkohë, përmes një postimi të publikuar ditën e sotme në “Facebook” Imami ka publikuar dokumentet e prokurorisë, duke ngritur akuza të forta për vendimin.