Policia e Fierit ka bërë të mundur parandalimin e një ngjarjeje e cila mund të kishte përrfunduar në tragjedi. Siç bëhet me dije nga njoftimi zyrtar i policisë, babë e bir Fakim dhe Petrit Zyka, kanë patur një konflikt me një fqinjin e tyre në fshatin Mbrostar Ura. Më pas situata ka agravuar deri në përdorimin e armëve ku 30 vjeçari Zyka ka marrë kallashnikovin dhe ka qëlluar në ajër duke kërcënuar fqinjin e tij. Policia ka mbërritur në vendngjarje dhe ka arrestuar babë e bir.
Njoftimi i plotë i Policisë:
Fier / Policia parandalon përshkallëzimin e mëtejshëm të një konflikti me pasoja të rënda për jetën. Reagimi i menjëhershëm dhe profesional i Policisë ka bërë të mundur neutralizimin dhe prangosjen e 30-vjeçarit, i cili gjuajti në ajër dhe kanosi me armë zjarri fqinjin e tij. Gjatë ndërhyrjes, Policia ka vënë në pranga edhe babain e 30-vjeçarit, pasi edhe ai posedonte një armë zjarri pistoletë. Sekuestrohet arma e zjarrit automatik me fishekë në fole gati për qitje, arma e zjarrit pistoletë dhe municion luftarak. Shërbimet e Komisariatit të Policisë Fier, pas një telefonate të ardhur në Sallën Operative të DVP Fier se në fshatin Mbrostar Ura, një shtetas po qëllonte me armë zjarri, menjëherë kanë shkuar në adresën e dhënë, duke parandaluar ngjarjen e mundshme kriminale. Punonjësit e Policisë kanë bërë të mundur neutralizimin dhe prangosjen e shtetasit Fakim(Ilvan) Zyka., i cili pas një konflikti për motive të dobëta me fqinjin e tij, shtetasin M. K., 55 vjeç, e ka kanosur atë duke gjuajtur në ajër me armë zjarri automatik, nga oborri i banesës së tij. Në vijim të veprimeve, nga specialistët për Hetimin e Krimeve në Komisariatin e Policisë Fier u arrestua në flagrancë shtetasi Fakim(Ilvan) Zyka., 30 vjeç, banues në Mbrostar Ura, Fier, si dhe babai i tij, shtetasit Petrit Zyka, 59 vjeç, banues në Mbrostar Ura, Fier, i cili mbante pa leje një armë zjarri pistoletë. U sekuestruan në cilësinë e provës materiale një armë zjarri automatik, një pistoletë dhe një krehër me 18 fishekë. Materialet do i kalojnë Prokurorisë pranë Gjykatës së Shkallës së Parë Fier, për veprat penale “Mbajtja pa leje e armëve dhe municionit luftarak” dhe “Kanosja”.