Policia e Shkodrës ka zbardhur detaje në lidhje me aksionin e mbrëmshëm dhe plagosjen e 52-vjeçarit Ardian Narkaj. Ky i fusnit ishte shpallur në kërkim prej 10 vitesh nga ana e policisë për vrasjen e dy bashkëfshatarëve të tij. Policia ka bërë me dije se Narkaj nuk i është bindur urdhrit të policisë, por ka tentuar të largohet duke përfituar nga terreni i vështirë malor. Më pas ai është rrethuar nga forcat RENEA ku ishte fshehur në një stan bagëtish dhe efektivët i kanë bërë thirrje për t'u dorëzuar. Por ai nuk i është bindur urdhrit dhe ka tentuar të largohetl. Më pas RENEA e ka qëlluar duke e plagosur.
Njoftimi i Policisë:
Në vijim të punës për kapjen e personave të shpallur në kërkim me rrezikshmëri të lartë shoqërore në fushën e krimeve ndaj personit, strukturat e DVP Shkodër, në bashkëpunim me forcat RENEA, në bazë të informacioneve të marra për vendndodhjen e një personi të shpallur në kërkim prej 10 vitesh, i dënuar për vrasje të dyfishtë, kanë organizuar dhe zhvilluar operacionin policor të koduar "Bratosh". Në një zonë malore të Kastratit, në vendin e quajtur "Gropat e Vrinit" Bratosh, Malësi e Madhe, forcat speciale RENEA kanë rrethuar vendin (stan bagëtish) ku fshihej shtetasi në kërkim Ardian Narkaj dhe i kanë bërë thirrje për t'u dorëzuar. Ky shtetas nuk i është bindur urdhrit të policisë, por ka tentuar të largohet duke përfituar nga terreni i vështirë malor. Forcat speciale RENEA kanë marrë masa për sigurinë e jetës së tyre, pasi kanë konstatuar se ky person ishte i armatosur. Ata i kanë bërë disa herë thirrje për tu dorëzuar. Ardian Narkaj nuk i është bindur urdhrit përsëritës të Policisë për t’u dorëzuar dhe ka tentuar të largohet. Forcat RENEA, për ta neutralizuar e kanë plagosur atë. 52 vjeçarit i është dhënë ndihma e parë nga Renea dhe më pas është transportuar në Spitalin e Traumës në gjendje të stabilizuar. Në cilësinë e provës materiale në vendngjarje është gjetur dhe sekuestruar një armë zjarri.