Ardian Narkaj është 52-vjeçari që u plagos nga RENEA gjatë ndjekjes dhe kërkimit për vrasjen e dy personave në vitin 2008. Ai ishte në listën e personave të shumëkërkuar dhe ishte dënuar me 21 vite burg. Mësohet se mbrëmjen e djeshme ai u përball me shtetin dhe nuk pranoi të dorëzohehj dhe i ka kundërshtuar me armë zjarri. Më pas efektivët iu përgjigjën duke e plagosur rëndë dhe më pas e dërguan në spitalin e Traumës në Tiranë.
Vrasja e dyfishtë në 2008
Ardian Narkaj u dënua nga gjykata për një vrasje të dyfishtë të ndodhur në vitin 2008 në Malësinë e Madhe. Ngjarja ndodhi në fshatin Bratosh, ku viktimë mbetën Tonin Ulaj dhe Gjergj Shota. Krimi i dyfishtë ndodhi gjatë kohës kur dy viktimat ishin persona të shpallur në kërkim nga policia për disa vepra të rënda penale. Gazetari i “ABC” Simon Shkreli raporton se gjithçka mes palëve nisi pasi Narkaj pretendonte se Ulaj dhe Shota i kishin ngacmuar vajzën. Ngjarja e rëndë ndodhi mbrëmjen e 7 majit të vitit 2008 në fshatin Bratosh të Malësisë së Madhe. Dy të rinjtë u qëlluan me breshëri arme zjarri, duke vdekur në vend, ndërsa i plagosur ngeli edhe vetë Ardian Narkaj. I mbijetuari ishte dëshmitari kyç i ngjarjes, i cili më vonë rezultoi të ishte dhe autori i krimit të dyfishtë. Pasi qëndroi disa muaj në burg, Apeli e liroi me kusht, vendimi u ankimua, por Narkaj u arratis në kohën që gjykata e shpalli fajtor për vrasjen e dyfishtë.
