Aksidentet rrugore vijojnë të mbeten një sfidë për autoritetet, ndërsa nuk janë të pakta rastet që përfundojnë me pasoja tragjike. Në gjashtë muajt e parë të vitit 2021, ka pasur një rritje prej 32,9% në krahasim me vitin e kaluar kur kishte masa kufizuese për shkak të Covid-19. Raportohet se në 6 muajt e parë janë numëruar 671 aksidente rrugore nga 505 aksidente të ndodhura në gjashtëmujorin e parë të vitit 2020. Ndërsa numri i të aksidentuarve është 875 persona nga 656 persona në gjashtëmujorin e parë të vitit 2020.
Për sa i përket jetëve të humbura, numri i të viktimave nga aksidentet rrugore është 105 persona nga 74 persona të vdekur në të njëjtën periudhë të një viti më parë. Në gjashtëmujorin e parë të vitit 2021 aksidentet rrugore, në 17,6 % të rasteve kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është rritur në 45,7 %, krahasuar me një vit më parë. Gjithashtu, sipas raportit të INSTAT, në muajin qershor të vitit 2021 numërohen 124 aksidente rrugore nga 115 aksidente të ndodhura në muajin qershor të 2020, duke u rritur me 7,8 %, krahasuar me të njëjtën periudhë të vitit të kaluar.
Numri i të aksidentuarve (të vrarë dhe të plagosur) është 161 persona nga 143 që ishte në të njëjtin muaj të një viti më parë. Ndërsa numri i të vdekurve nga aksidentet rrugore është 15 persona nga 16 persona të vdekur në muajin qershor të një vitit 2020. Në muajin qershor të vitit 2021, aksidentet rrugore në 86,3 % të rasteve kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25-34 vjeç, duke zënë 29,0 % të numrit të aksidenteve gjithsej. Aksidentet në këtë grup-moshë janë ulur me 14,3 %, krahasuar me të njëjtën periudhë të një viti më parë.