Të parrethuara dhe pa asnjë kusht minimal, fusha e mbeturinave të Fushë-Krujës është kthyer në një rrezik të madh për të gjithë zonën. Vend-depozitimi i mbeturinave të Fushë-Krujës mund të rezultojë në një katastrofë mjedisore nëse nuk ndërhyhet sa më parë. Pirgu i mbeturinave sa vjen dhe shtohet duke u kthyer në një rrezik serioz edhe për ndotjen e ujërave të ujëmbledhësit të Fushë Krujës që ndodhet pranë vendit të caktuar për hedhjen e mbeturinave. Kujtojmë se disa ditë më parë në këtë vend-depozitim ka rënë zjarr, gjë që ka bërë jetesën e fshatrave përreth thuajse të pamundur, derisa është kërkuar ndërhyrja e zjarrfikëses.
Sipas dëshmive të banorëve zjarri u vihet qëllimisht mbeturinave për të ulur volumin e madh të krijuar. Paradoksalisht ky vend-depozitim vazhdon të jetë pa leje mjedisore që prej dy dekadash në shkelje të hapur me ligjin. Sipas TCH, në të njëjtën situatë katastrofike gjendet edhe fusha ku derdhen mbeturinat e qytetit të Krujës. E vendosur në një gurore të braktisur që prej vitit 2014 edhe kjo pikë grumbullimi operon pa leje mjedisore. Ndonëse herë pas here mbeturinat mbulohen me inerte, as ky vend-depozitimi mbeturinash nuk plotëson asnjë parametër mjedisor.
