Pandemia e koronavirusit ka shkaktuar probleme të shumta. Një ndër to është edhe se shqiptarët nuk mund të udhëtojnë në drejtim të Greqisë. Edhe pse pala greke ka njoftuar se do të ketë lehtësi sa i përket qarkullimit në të dy anët e kufirit me Shqipërinë, duket se nga e thëna në të bërë ka shumë diferencë. Burime për TCH bëjnë me dije se ditën e sotme vetëm 870 qytetarë shqiptarë kanë kaluar përmes pikëkalimit të Kakavijës përgjatë 24 orëve të fundit duke mos e plotësuar kuotën ditore prej 1500 qytetarësh.
Kjo ka ndodhur pasi linjat e transportit nuk lejohen të qarkullojnë në anën tjetër të kufirit me pretendimin se rregulli i ri i miratuar ende nuk është dërguar tek autoritetet shqiptare. Megjithatë kjo nuk po ndodh në anën tjetër në hyrje nga Greqia. 940 qytetarë kanë hyrë gjatë 24 orëve të fundit, shumica janë këmbësorë që detyrohen ta kalojnë kufirin në këmbë. Po ashtu edhe në Kapshticë është e njëjta situatë. Leje kalimi kanë punëtorët sezonalë apo ata që kanë një pasaportë greke, me limitin e vetëm 400 personave në ditë.
Edhe pse u njoftua që nga 19 qershori kjo pikë kufitare do të hapej për udhëtarët edhe këtu autoritetet kufitare nuk kanë marrë ende “firmën” zyrtare për të lejuar kalimin e qytetarëve. Kujtojmë se një vit më parë për shkak të pandemisë, në kufijtë me Greqinë u krijua radhë kilometrike që vijonte për ditë me radhë, për shkak të numrit të kufizuar të personave që mund të kalonin në Greqi.
