Janë zbardhur shkaqet e plagosjes së djeshme në Sarandë, ku u qëllua me 20 plumba në drejtim të pronarit të "Orange", Spiro Iljadhi 35 vjeç, pranë lokalit të tij ndërs u plagos rastësisht edhe një pushues i identifikuar si Marin Jano 33 vjeç. Gjithçka ka nisur në momentin kur tre autorët Andrea Caushi, Visi Caushi (vëllezër) dhe shoku i tyre Redjan Hadëri u nxorrën jashtë nga roja i sigurisë së loaklit, raporton Report Tv. Arsyet e nxjerrjes së tyre jashtë nuk bëhen të ditura, por tre personat nuk e kanë lënë me kaq. Ata janë kthyer me armë dhe kanë qëlluar në drejtim të lokalit dhe automjetit “Range Rover” të pronarit Spiro Iljadhi.
Menjëherë sapo dëgjoi krismat, Iljadhi ka dalë jashtë po nuk dihet saktësihst nëse plumbat e kanë kapur teksa po dilte, apo nëse autorët kanë qëlluar direkt në drejtim të tij.Dje policia deklaroi se plagosja ka ndodhur për shkak të një konflikti të rastit. Kujtojmë se “Orange” është një nga clubet e njohura në Sarandë dhe organizator i shumë spektakleve të këngëtarëve VIP. Pak ditë më parë Iljadhi, kishte hapur një filial të ri të lokalit "Orange" në Ksamil.