Nesër starton Euro2020 dhe ndeshja e parë e këtij kompeticioni kaq të rëndësishëm do të luhet në Itali. Italia dhe Turqia do të zbresin në fushën e blertë të 'Olimpico” të Romës në orën 21:00. Por festimet dhe ceremonia hapëse pritet që të fillojë që në orën 19:00. Mediat italiane kanë raportuar se Andrea Bocelli do të këndojë këngën “Nessun Dorma”, ndërsa në skenën që do të improvizohet në “Olimpico” do të ngjitet i pari Ermal Meta. 40-vjeçari shqiptar do të këndojë këngën e tij "UNO" e cila është pjesë e albumit të ri “Tribu Urbana”, teksa një muaj më parë u publikua edhe videoklipi.
Ndërsa vlen të përmendet se kjo nuk është hera e parë që një artist shqiptar performon në ceremoninë hapëse të ndonjë kampionati zyrtar. Një gjë të tillë e ka bërë edhe këngëtarja Era Istrefi e cila pati kënduar në hapjen e Kampionatit Botëror “Rusia 2018”.
