Vdekja e 23-vjeçares Evgjeni Baxho në Tiranë vijon të mbetet një mister, ndërsa detajet e reja e bëjnë edhe më të komplikuar çështjen. Në trupin e saj janë gjetur disa simbole të pikturuara me ngjyrë të kuqe që ende nuk dihet se çfarë kuptimi kanë. "TCH" ka mësuar se një simbol i ngjashëm me atë që u gjet në trupin e Evegjeni Baxhos qarkullon edhe në rrugët e kryeqytetit. Fotografia e siguruar nga gazetarja Anila Hoxha tregon simbolin që ishte në barkun e 23-vjeçares Evgjeni Baxhos të pikturuar në një mur prapa gjimanzit “Ismail Qemali”.
“Ai po vjen”, shkruhet në gjuhën angleze, por nuk kuptohet se kujt i referohet dhe mbetet e paqartë domethënia e këtij simboli.
Në fillim u tha se e reja kishte humbur jetën pas një infeksioni në dhëmballë, por me detajet e reja të zbuluara së fundmi ky variant është hedhur poshtë. Në trupin e saj janë gjetur disa shkrime misterioze në bark, qafë dhe shpinë të shkruar me lapostil të kuq por që ende nuk dihet kuptimi i tyre. Ndërsa ende nuk ka një përgjigje zyrtare nga mjekësia ligjore për vdekjen e 23-vjeçares e cila sipas analizave kishte pasur komplikacione në mushkëri.
Grupi hetimor ka treguar se në vendin e ngjarjes pranë vajzës ka gjetur një recete, një raport të marrë nga instituti shëndetësor të firmosur në datën 12 maj, një fletë e bardhë e shkruar me shkrim dore me stilolaps blu, që fillon me fjalët: “Vet nga fjala virtualizëm ‘ dhe përfundon me shkronja shtypi “DISK DEFRAGMENT’ . "TCH" ka mësuar se letra ka 16 rreshta ku pas numrit 4 shkruhet “borë metal”. Në lidhje me këtë ngjarje është marrë në pyetje edhe një mik i 23-vjeçares i cili ka deklaruar në polici se nuk kishte vënë re asnjë detaj të dyshimtë te ajo.
