Para pak çastesh është kapur një sasi rekord kokaine në Kosovë e cila ishte nisur nga Amerika e Jugut dhe kishte kaluar edhe në Shqipëri. DEA Amerikane, e cila ka sinjalizuar për ngarkesën, ka njoftuar se bëhet fjalë për një sasi prej mbi 2 tonë kokaine, me destinacion Lipjanin e Kosovës. Sipas DEA-s kjo është sasia më e madhe e kapur ndonjëherë në rajon dhe ishte e ndarë në 17 kuti të vogla kartoni. Kokaina ishte fshehur në kamionin me mish pule dhe konteineri u nis nga Amerika e Jugut, ndaloi në Gioia Tauro në Itali dhe më pas ndaloi në Durrës.
Pasi ka mbërritur në Shqipëri, ngarkesa ka qendruar 15 ditë në Portin e Durrësit derisa janë kryer të gjitha procedurat, por policia nuk ka ndërhyrë me qëllim që të zbulonte destinacionin përfundimtar. Ndërsa pasi janë kryer procedurat, kontenieri është vendosur mbi një kamion, i cili është tërhequr nga një kamion tjetër, dhe të dy janë nisur për në Kosovë. Në momentin që kamioni ka kaluar kufirin, është njoftuar edhe policia e Kosovës e cila ka ndërhyrë dhe ka bërë sekuestrimin e sasisë së drogës më e madhja e kapur ndonjëherë.
