Këtë fundjavë Greqia hapi dyert për nisjen e sezonit turistik dhe në Aeroportin Ndërkombëtar të Athinës dhe 13 aeroporte të tjera greke janë kryer mbi 200 fluturime gjatë këtyre tre ditëve. Vetëm në 4 ishuj në jug të Egjeut, përfshirë Mykonos, ditën e djeshme mbërritën 32 fluturime ndërkombëtare kryesisht nga Suedia, Gjermania dhe Katari. Edhe Korfuzi, në detin Jon, mirëpriti vizitorë nga Gjermania dhe Franca. Greqia synon të lërë pas goditjen që mori vitin e kaluar për shkak të pandemisë Covid, ku numri i turistëvë nuk i kaloi 7 milionë, shifër kjo tepër e ulët në krahasim me rekordin prej 33 milionë vizitorësh në vitin 2019. Të ardhurat vitin e kaluar ishin vetëm 4,1 mld euro, pothuajse çereku i të ardhurave të vitit 2019.
Kjo është fundjava e parë, pas karantiës së tejzgjatur në Greqi, dhe “festa e lirisë” ka bërë që të rritet ndjeshëm numri i personave që udhëtuan apo lëvizën për vizita tek njëri-tjetri. Për të hyrë në Greqi kërkohet që turistët të jenë të vaksinuar ose të jenë me testin negativ për Covid. Ndërkohë turistët nga Shqipëria dhe Kosova ende nuk lejohen të hyjnë, ndonëse vendet e tjera të Ballkanit lejohen.