Pesë ditë pas tragjedisë në rrugën Panagouli, ku Karolin Anagnostopulos mbeti e vrarë nga disa grabitës, bashkëshorti i saj i tha lamtumirë për herë të fundit përmes një postimi prekës në rrjetet sociale. 32-vjeçari shpërndau një foto nga martesa e tyre, ndërsa krahas fotos shkruante: “Përgjithmonë bashkë. Udhëtim të mbarë dashuria ime.”
Kujtojmë, se autoritetet në Greqi kanë arrestuar në Evros një person nga Gjeorgjia me pasaportë false dhe tashmë po hetojnë nëse ka lidhje me bandën që vrau 20-vjeçaren britanike. Gjeorgjiani u arrestua në pikën kufitare teksa përpiqej të largohej nga vendi, por pasi u ndalua nga policia për të verifikuar dokumentacionin, u zbulua se kishte pasaportë false dhe u arrestua.
Pas analizës së ADN-së, u zbulua se personi në fjalë ka marrë pjesë në një grabitje të ndodhur më 7 mars në Pikermi, ku autorët lidhën dhe rrahën një çift të moshuarish dhe më pas morën disa para dhe bizhuteri. Tashmë autoritetet po hetojnë nëse i arrestuari ka lidhje me bandën që kreu vrasjen që tronditi Greqinë.