Shkëlqim Fusha dhe firma e tij FUSHA duket se kanë një “dashuri” të përjetshme me Bashkinë Tiranë. Themi kështu, pasi numri i tenderave të fituara nga kjo kompani përgjatë viteve të fundit nga bashkia Tiranë, shkon në nivele mjaft të larta. Sipas të dhënave publike, mësohet se në 8-9 vitet e fundit, FUSHA ka përfituar tendera nga institucionet shtetërore në një vlerë marramendëse që shkon në mbi 115 milion euro. Nga këto, mbi 51 milion euro i ka përfituar vetëm nga Bashkia Tiranë.
Pra shihet qartë që gati gjysmën e tenderave të përfituara kjo firmë i ka marrë nga bashkia e kryeqytetit. Mirëpo duket se kaq nuk ka mjaftuar, dhe kjo bashki i ka dhënë rreth 100 milionë lëkë të tjera të vjetra me TVSH firmës së drejtuar nga Shkëlqim Fusha. Më konkretisht bëhet fjalë për procedurën e prokurimit që mban numrin e referencës REF-90929-03-24-2021. Ky tender ka si objekt “Shërbime të pastrimit dhe gjelbërimit” dhe ka një fond limit në vlerën 8,429,587 lekë të reja pa TVSH. Ai është organizuar nga Tirana Parking, një organizim i varur direkt nga Bashkia Tiranë.
E drejtuar nga drejtoresha Eglantina Zëre, ky organizim ka si objektiv kryesor që të administrojё shёrbimin e parkimit publik me pagesё nё Bashkinё e Tiranёs, mbi tokё dhe nёntokё, nё pёrputhje me zonat e pёrcaktuara pёr kёtё qёllim dhe tё vjelё tё ardhurat e gjeneruara prej tij. Duke investiguar në të dhënat e tenderit shihet se në garë kanë marrë pjesë vetëm dy kompani, të cilat për habi kane ofruar vlera thuajse të njëjta, më një diferencë prej rreth 1 milionë lekësh të vjetra me TVSH.
Ky është një fakt tepër i dyshimtë, pasi në praktikën e procedurave të prokurimit, ky fakt shpesh nënkupton se kemi të bëjmë më një fitues të paracaktuar. E në fakt fitues është shpallur firma FUSHA me një vlerë të ofruar prej rreth 100 milionë lëkë të vjetra me TVSH. Gjithashtu shikohet se dhe diferenca mes vlerës fituese dhe fondit limit është tepër e vogël, përkatësisht sa 98.64%. Edhe ky është një fakt tepër i dyshimtë i cili ka supozon se fituesi ka qenë i paracaktuar.
