Për Cristiano Ronaldo ka ardhur momenti të nisë një tjetër cikël në karrierën e tij. Mënyra e sjelljes së portugezit në dy golat që i dhanë fitoren Juventusit ndaj Parmës ishte një sinjal i qartë se CR7 nuk ndihet më i lumtur te bardhezinjtë dhe kërkon të ndryshojë ambient. Ronaldo nuk festoi duke qëndruar statik në golin e dytë të Alex Sandros dhe finalizimin e De Ligt si për të treguar se ka ardhur koha të hapë një faqe të re.
Ndërkohë, Gazzetta Dello Sport raporton se Ronaldo i ka kërkuar agjentit të tij historik Jorge Mendes të nisë kontaktet për t’i gjetur një sistemim të ri. Dëshira e yllit portugez është të rikthehet te Manchester United për të luajtur edhe për 2 apo 3 sezone në nivelet më të larta të futbollit anglez.
Mendes ka nisur të studiojë menjëherë terrenin nëse United i ka mundësitë financiare për të rikthyer në “gjirin e saj” Cristiano Ronaldon një ndër futbollistët më të mirë që ka patur ndonjëherë në historinë e saj. Siç duket CR7 e ka ndarë tashmë mendjen dhe do të lërë Juventusin në verë, një vit para përfundimit të kontratës.