Policia ka dhënë njoftimin e saj zyrtar në lidhje me konfliktin e mesnatës së djeshme pranë zyrave të LSI-së në Sauk ku mbetën të plagosur vëllezërit Roland dhe Oltjan Doka. Ndërkohë Fax raporton se të plagosurit janë të afërm të kandidatit për deputet nga LSI Klodian Doka. Policia bën me dije se për këtë ngjarje janë shpallur në kërkim shtetasit E. S., 26 vjeç, A. M., 25 vjeç dhe S. K., 34 vjeç, ndërkohë që të plagosurit ndodhen jashtë rrezikut për jetën.
Njoftimi i plotë:
Më datë 17.04.2021, u referuan materialet në Prokurorinë pranë Gjykatës së Shkallës Parë Tiranë dhe punohet për kapjen e shtetasve të shpallur në kërkim E. S., 26 vjeç, A. M., 25 vjeç dhe S. K., 34 vjeç, pasi në rrugën “Selim Braja” në Sauk të Vjetër, janë konfliktuar për motive të dobëta me shtetasit K. D., 30 vjeç, E. D., 23 vjeç dhe R. D., 27 vjeç (vëllezër). Si pasojë e konfliktit janë dëmtuar lehtë me sende të forta shtetasit K. D dhe E. D, si dhe është dëmtuar me mjet prerës shtetasi R. D, i cili ndodhet në spital, jashtë rrezikut për jetën. Në vijim të veprimeve u procedua në gjendje të lirë shtetasi B. H., 36 vjeç, pasi ka kanosur shtetasin K. D. Punohet për kapjen dhe shoqërimin e 3 shtetasve të shpallur në kërkim.