Policia e Çikagos ka publikuar pamjet filmike të një oficeri që qëllon për vdekje një djalë 13-vjeçar në një rrugicë të errët. Videoja e kamerave të trupit tregon policin duke bërtitur "lëshoje" përpara se të qëllonte Adam Toledo një herë në gjoks në 29 Mars. Djali nuk duket se mban armë kur u qëllua, por video e policisë tregon një pistoletë afër vendit ku ai bie. Protesta të vogla u mbajtën të Enjten në mbrëmje rreth Çikagos, disa orë pasi kryebashkiaku i qytetit bëri thirrje për qetësi. Publikimi i videos vijon me të shtënat fatale të policisë në 11 Prill të Daunte Wright nga një oficer në një periferi të Minneapolis. Kjo ngjarje ka shkaktuar protesta të dhunshme ndërsa qyteti pret rezultatin e gjyqit të Derek Chauvin, oficerit të akuzuar në vdekjen e George Floyd.
Në pamjet filmike duket oficeri që del nga makina e tij dhe vihet në ndjekje të djalit nëpër një rrugicë të errët ndërsa një i dyshuar tjetër zhduket nga sytë. Polici i kërkon të ndalojë dhe të tregojë duart pasi dyshonin se kishte armë me vete. Djali kthehet dhe ngre duart, ndërsa oficeri e qëllon me armë 19 sekonda pasi kishte dalë nga makina e skuadrës së tij.
Burimi:bbc Përktheu dhe përshtati:JOQ ALBANIA