Ironia në artikullin që do të trajtojmë sot qëndron pikërisht në faktin se fitues i një procedure prokurimi publik është shpallur një zotërues i një kompanie, i cili është dënuar për objektin e tenderit në të cilin ka dalë fitues. Rahmi Dajlani i ALPEN PULITO ka fituar 43 milionë lekë pa TVSH nga Spitali Ihsan Cabej Lushnje për “Dezinfektim të ambienteve të brendshme dhe të jashtme të Spitalit dhe Poliklinika Lushnje për situatën e krijuar nga Covid -19”. Sipas burimeve për JOQ, ky spital rezulton ndër më të ndoturit, me higjienë 0, raportojnë familjarët e të shtruarve me COVID aty.
Por fakti qesharak në gjithë këtë histori është fakti se Dajlani, zotërues me 100% i kompanisë që ka fituar tenderin ka qenë arrestuar nga policia për krimin mjedisor të ndotjes së ajrit. Rreth një vit më parë, ai ka hedhur karroca me thasë plehrash në Shkozet të Durrësit. Rezulton se kompania e Dajlanit është përfituese e një tenderi prej 32 milionësh nga Bashkia e Tiranës vetëm pak kohë më parë. Objekti i tenderit ishte “Shërbim dezinfektimi i ambienteve, në kuadër të nevojave për parandalimin e përhapjes së COVID-19”.
Sipas një kërkimi të thjeshtë, rezulton se kompania e Dajlanit ka përfituar 14 kontrata publike në rang lokal, 7 në sektorin e shëndetësisë, 3 në sektorin e ndërmarrjeve publike dhe 1 në agjencinë e blerjeve të përqendruara. Kjo kompani ka përfituar jo pak por më shumë se 202 milionë lekë pa TVSH përgjatë viteve 2015-2018 dhe nga 2019 e deri më tani mbi 174 milionë lekë.
*Shënim I: Pjesët e nënvizuara në tekst me ngjyrë të kuqe, janë hiperlinke që të drejtojnë në faqe të tjera, informacione shtesë, shpjeguese në lidhje me lajmin*
© 2021 JOQ ALBANIA Të gjitha të drejtat e rezervuara
Ky artikull është ekskluziv i JOQ ALBANIA, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar JOQ ALBANIA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
