Mbrëmjen e kaluar Shqipëria mposhti me rezultatin 0-2 San Marinon në transfertë, por kritikat për paraqitjen e kuqezinjve ishin të shumta, pasi përpjekjet për gol ishin të shumta derisa Manaj zhbllokoi ndeshjen me një gol. Me këtë fitore kuqezinjtë shkojnë në vendin e tretë me 6 pikë, një më pak se Hungaria e tre më pak se Anglia kryesuese e grupit eliminator, megjithatë suksesi në San Marino pati një vlerë tjetër statistikore për Kombëtaren Shqiptare.
Kjo pasi skuadra e drejtuar nga Edy Reja nuk humb në transfertë prej 6 ndeshjesh radhazi dhe për më tepër, në të 6 këto sfida nuk ka pësuar asnjë gol. Humbja e fundit në transfertë për kuqezinjtë, daton më 11 tetor të 2019-ës me rezultatin 1-0 në Turqi, ku u ndëshkuam nga një gol i Tosun në minutën e 90’. Ndërsa kjo ecuri pozitive në transfertë është evidentuar edhe nga UEFA në faqen e saj zyrtare, por 6 këto përballje kanë qenë me kundërshtarë që pozicionohen poshtë Shqipërisë në renditjen e FIFA-s.
Gjithçka ka nisur me triumfin 0-4 në transfertën ndaj Moldavisë më 14 tetor të 2019-ës, për të vijuar më pas me suksesin 0-2 në transfertën ndaj Bjellorusisë, dy barazime pa gola në Ligën e Kombeve ndaj Kazakistanit dhe Lituanisë, si dhe dy fitoret e fundit 0-1 ndaj Andorrës dhe 0-2 ndaj San Marinos. Ndërkohë kujtojmë se më 2 shtator kuqezinjtë e Edi Rejës përballen me Poloninë dhe kërkohet ruajtje e kësaj ecurie edhe për vetë kundërshtarin që përballemi.
