Seanca për shqyrtimin e ankesës për rritjen e dënimit për rastin e vrasjes së Kujtim Veselit, e paraparë të mbahet të mërkurën në Gjykatën e Apelit është shtyrë.
Shtyrjen e seancës e ka konfirmuar avokatja e familjes Veselit, Rina Kika, e cila tha në seancë ka munguar mbrojtja e të akuzuarit.
Ajo theksoi se kanë bërë ankesë që dënimi të zgjatet në 35 vjet, nga 25 sa ka marrë vendim gjykata.
“Unë përfaqësoj familjen e Kujtim Veselit i cili u vra më 11 korrik të vitit 2019 . Sot para Gjykatës së Apelit ka pasur të mbahej seanca e shqyrtimit të ankesës për rritjen e dënimit ndaj Sefedin Osmanit, i cili u dënua vetëm me 25 vjet burgim. Ne kemi bërë ankesë që dënimi të rritet deri në 35 vjet. Kodi Penal i Kosovës e mundëson një gjë të tillë. Seanca është shtyrë për 11 mars në orën 10 e 15 meqë mbrojtësi i të akuzuarit nuk ka qenë i pranishëm. Vrasja dhe dhunimi seksual i Kujtimit nuk do të kishte ndodhur po të mos ishte për neglizhencën e skajshme të shtetit ku Sefedini ka pranuar se e kishte dhunuar seksualisht Kujtimin dhe nuk ishte ndaluar as nga policia. Fushata: “Drejtësi për Kujtimin”, i ka tri kërkesa dhe kemi kërkuar policisë dhe prokurorisë të kërkojnë falje dhe kompensim për dëmin që i është shkaktuar”, tha ajo.
Seanca është shtyrë për 11 mars në orën 10 e 15.
Gjykata Themelore në Prishtinë më 12.10.2020 ka shpallur aktgjykimin me të cilin e ka dënuar Sefedin Osmanin me 25 vjet burgim për vrasjen dhe dhunimin seksual të Kujtim Veselit.
