Ditën e djeshme u kryen homazhet e legjendës së futbollit botëror, Diego Armando Maradona.
Të shumtë ishin ata që iu bashkuan këtyre homazheve që u mbajtën në Pallatin Presidencia në Buenos Aires për t’i dhënë lamtumirën e fundit Maradonës. Arkivoli i ish-futbollistit u vendos për orë të tëra në këtë pallat dhe qindra njerëz e brohoritën dhe i kaluan pranë duke e vështruar për herë të fundit.
Tifozët e tij ishin aq të shumtë saqë orari i vendosur për homazhe ishte i pamjaftueshëm dhe pamundësia për ta vizituar të gjithë solli përplasje të ashpra me forcat e rendit. Kjo solli që axhenda të shtyhej me 3 orë të tjera derisa Maradona u përcoll drejt banesës së fundit, rrugëtim i cili nuk mund të mos ndiqej nga mijëra njerëz.
Më media qarkulluan lajme se vetë Maradona kishte kërkuar në një testament që trupi i tij tē balsamosej, por këto lajme u hodhën poshtë kur ai u varros në Bela Vista, periferi e kryeqytetit, atje ku ndodhen edhe prindërit e tij. Me kërkesë të familjes, ceremonia e varrimit u zhvillua në mënyrë private.
Nga ana tjetër tifozët italianë të Maradonës u mblodhën në stadiumin San Paolo të Napolit, përpara ndeshjes së Europa League të Napolit, me këngë dhe flakadanë të kuq, duke nderuar ikonën e klubit të tyre. Të gjithë futbollistët zbritën në fushë me fanelën numër 10 të Maradonës, ndërsa e përcollën në mënyrën më dinjitoze të mundshme, duke triumfuar në San Paolo.
