Qeveria Britanike ka publikuar së fundmi rregullat e reja anti COVID-19, ku parashihet se cilat qytete do të mund t’i lejojnë tifozët nëpër stadiume. Klubet nga Premierliga që vijnë nga qytetet e Liverpoolit dhe Londrës mund të mirëpresin tifozët në stadiumet e tyre sipas rregullave të reja. Ndërkaq, klube si: Manchester United, Manchester City, Aston Villa, Leicester City, nuk do të jenë në gjendje të lejojnë tifozët nëpër stadiumet e tyre, sipas rregullave Qeveritare. Por edhe për klubet si: Newcastle, Leeds, Sheffield United, West Brom dhe Wolves duhet të presin për udhëzimet e reja nga Qeveria.
Qyteti i Manchesterit, konsiderohet me rrezikshmëri të lartë dhe nuk do të lejohet të ketë prani të tifozëve me rregullat e reja që hyjnë në fuqi me 2 dhjetor. Qyteti i Liverpoolit, ku janë të bazuara klube si: Liverpool dhe Everton do të mund të mirëpresin deri në 2000 tifozë në stadium, për sa kohë ju përmbahen kufizimeve strikte të COVID-19. Kjo do të shihte tifozë në Anfield për herën e parë këtë vit që nga fillimi i pandemisë. Edhe Londra ka hyrë në kategorinë me rrezikshmëri të mesme, ku do të lejohen të marrin pjesë deri në 2000 persona në stadiume. Këto rregulla i konfirmoi Sekretari i Shëndetit Matt Handock të ejten.
