Që vidhet me rrugët këtë nuk e luan as topi. Madje jo vjedhje e thjeshtë, por bëhet fjalë për vjedhje të një niveli galopant. Kjo për vetë faktin se paratë që qarkullojnë tek rrugët janë të një niveli tepër të madh aq sa për të mbushur xhepat e gjithë fisit, jo thjesht të tuat. Dhe natyrisht në krye të institucioneve të cilat japin tendera për rrugët duhet të vendosen ustallarë të mirë. Nga ata që kanë përfunduar edhe “doktoraturën” për shkathtësi të theksuar në mbushjen e xhepave. Nuk është çudi që njerëz të tillë të kenë qenë në të njëjtën shkollë me Lupenin e famshëm.
E pra, një ndër institucionet ku luhet lek i madh, siç thotë populli, është edhe Autoriteti Rrugor Shqiptar, shkurt ARRSH. Rezulton se drejtori i këtij institucioni, Ergys Verdho ka organizuar një tender me fond limit 2.399.999.882 lekë të reja pa TVSH ose rreth 23,2 milionë euro me TVSH. Tenderi në fjalë mban numrin e referencës REF-69427-08-21-2020 dhe është hapur në datë 24.08.2020. data e mbylljes së këtij tenderi ka qenë vetëm pak ditë më parë, përkatësisht në datë 24.09.2020.
Objekti i këtij tenderi është “Ndërtim rruga Korçë – Ersekë, Loti 2 (pjesa e parë)”. Problemi është se gjithë këto para nuk do të shpenzohen për të gjithë aksin Korçë-Ersekë, aspak! Këto 23,2 milionë euro sipas dokumentave të tenderit rezulton të jenë dhënë për jo më shumë se 4,15 kilometra! Po, po, e lexuat mirë. Nuk bëhet fjalë për 415 kilometra, por për 4,15. Që do të thotë se kosto për një kilometër e këtij loti është e barabartë me rreth 5,6 milionë euro! Tashmë mbetet vetëm për të pritur se cili do të shpallet fituesi. Sidoqoftë, bravo Ergys, ia ke “futur” dhe vetë Lupenit!
