PSG-ja do të luajë nesër ndeshjen kundër Lens për të filluar sezonin e tyre të Ligue 1. Megjithatë, skuadra që do të futet në fushë do të jetë pothuajse e panjohur nga ajo që luante në finalen e Champions League.
Kampionët francezë janë përgjysmuar nga koronavirusi dhe janë pa shtatë yje të ekipit të parë që iu është dashur të karantinohen.
Kylian Mbappe është emri i fundit i madh që është goditur nga COVID-19. 21-vjeçari do të humbasë ndeshjen e së enjtes kundër Lens dhe ndeshjen e madhe të së dielës ndaj Marseille së bashku me gjashtë lojtarë të tjerë.
Neymar, një tjetër lojtar i madh i PSG-së gjithashtu nuk do të luajë. Sipas L’Equipe , braziliani doli pozitiv pasi shkoi me pushime të fund sezonit në Ibiza. Me të ishin edhe Angel Di Maria dhe Leandro Paredes, që po ashtu rezultuan pozitivë. Kështu Thomas Tuchelit do i duhet të riformatojë formacionin për dy ndeshjet e para të sezonit.
Sergio Rico pritet të jetë në portë, ndërsa Thilo Kehrer mund të luajë në vend të Marquinhos. Në mesfushë skuadra është solide pasi ka emra si Marco Verratti, Idrissa Gueye dhe Ander Herrera. Në sulm mund të luajë Julian Draxler, Pablo Sarabia dhe Eric Maxim Choupo-Moting.
