Rivalë të përjetshëm/ Habit Sergio Ramos: Dua që Messi të qëndrojë te Barcelona

Prej ditësh, Lionel Messi është tema kryesore e opinionit sportiv në mbarë botën. Argjentinasi ka dorëzuar një kërkesë për largim nga Barcelona dhe e ardhmja e tij pritet të jetë larg katalanasve.

Lidhur me vendimin e Messit ka pasur mendime të ndryshme, teksa ai që ka vendosur të komentojë së fundmi situatën, është rivali i tij i përjetshëm, Sergio Ramos.

Dueli mes tyre ka qenë gjithmonë i ashpër dhe shpesh nuk kanë munguar edhe ndërhyrjet brutale ndaj njëri-tjetrit. Megjithatë, përtej këtij rivaliteti, Ramos është shprehur se nuk dëshiron që Messi të largohet nga Barcelona.

Kapiteni i Realit u shpreh:

Nuk është një çështje që na shqetëson ne si ekip. Messi ka të drejtën për të vendosur të ardhmen e tij. Nuk e di nëse po e bën në mënyrën më të mirë, por sigurisht që për futbollin spanjoll, për Barcelonën dhe për ne, që na pëlqen të fitojmë duke u ndeshur me më të mirët, do të donim që ai të qëndronte. Messi e bën La Ligën dhe skuadrën e tij më të mirë, si dhe “El Clasicot” më të bukura."