Çunat e Rilindjes, qofshin problematikë apo të urtë, nuk e humbasin rastin që me putrat e tyre të stërmëdha të gllabërojnë sa më shumë para nga taksat që unë dhe ti paguajmë. Në fakt teorikisht ne i paguajmë taksat tona që larg qoftë kur të kemi nevojë për ambulancën apo policinë, ata të vijnë menjëherë pranë nesh në rast urgjence. Por fakti e ka treguar se gjasat më të mëdha janë që të vdesësh para se të vijë ambulanca apo policia. Kjo jo sepse stafi që punon aty nuk është i aftë, por ndoshta sepse paratë e taksave tona që duhet të shkonin për ta, shkojnë në fakt për xhepat e çunave të Rilindjes.
Njëri prej tyre, eshtë edhe Laert Duraj, administratori i Posta Shqiptare SH.A. Rezulton se Laerti i Rilindjes ka bërë një tender me objekt “Mirëmbajtja e Sistemit Eterna për tre vite” për të cilin ka shpenzuar plot 324 milionë lekë të vjetra me TVSH nga taksat tona. Fituese është shpallur kompania “Helius Systems” sh.p.k. Kjo kompani rezulton se praktikisht ka garuar me veten e saj.
Por përse e themi këtë? E themi sepse në këtë tender kanë marrë pjesë vetëm dy kompani, njëra kjo që fitoi ndërsa tjetra e cila ka ofruar vlerë zero. Pra praktikisht tenderi është thjesht një paçavure sepse fituesi në realitet është përcaktuar prej kohësh.
Shikoni se sa thjesht dhe pa i hyrë asnjë gjemb në këmbë, Laert Duraj i ka dhuruar plot 324 milionë lekë të vjetra pa TVSH kësaj kompanie. Nuk e kanë vrarë mendjen fare që të paktën të kujdeset disi sa për sy e faqe që kompania e dytë garuese të ofronte ndonjë vlerë më të lartë se fituesi. Por jo, i kanë rënë shkurt dhe kjo kompani ka ofruar vlerën zero. Kaq ka mjaftuar dhe fituesi është shpallur.
Po cili është fituesi do thoni ju? Firma “Helius Systems” sh.p.k. administrohet nga Alkid Ademi, ndërsa pronësia ndahet në kuota të barabarta prej 50% mes vetë Ademit dhe Gjergji Mullës. Dhe neve në këtë pikë s’na mbetet gjë tjetër veçse t’i urojmë që të kenë sa më shumë tendera të tillë pa garë nga çuna si Laerti apo shokët e tij të Rilindjes.
