Vazhdojnë përditë të dalin në pah abuzimet që bëjnë Lali Leku me miqtë e tij. Në rastin konkret është Redi Molla i UKT i cili i ka dhënë rreth 4 milionë euro një kompanie administratori i së cilës është arrestuar për skema mashtruese me TVSH. Bëhet fjalë për tenderin me objekt : “Ndërtim linje trasmetimi nga puseta Yzberisht deri në depon Katund, Katund i Ri: Ndërtim linje trasmetimi nga puseta Yzberisht deri në depon Qytet Nxënsave”.
Në këtë tender kanë marrë pjesë 5 kompani dhe ka fituar bashkimi i operatorëve ” Kupa” sh.p.k &”Sterkaj” sh.p.k &”LIQENI VII” sh.a &”Arbtrans-2010” sh.p.k. Por shikoni se çfarë ka ndodhur. Dy firma pasi kënë dhënë ofertën e tyre, befas janë tërhequr. Po, po. E lexuat mjaft mirë. Pasi kënë dhënë ofertën e tyre, ndonëse shifra ka qenë bindshëm shumë më lirë sesa kompania fituese, befas këto dy kompani janë tërhequr duke paraqitur deklaratën përkatëse.
Ky veprim është një indicie mjaft domethënëse se fituesi i tenderit është paracaktuar që më parë. Por prisni se skandali nuk mbaron këtu. Le të bëjmë një analizë të fituesëve. Konkretisht administratori i firmës &”Arbtrans-2010” sh.p.k. Fatmir Firi është arrestuar në shtator të vitit 2019 si i implikuar në një skemë mashtrimi me TVSH prej 30 milionë eurosh. Është e pakonceptueshme në fakt se si Erion Veliaj nëpërmjet UKT-së të mund t’i japë rreth 4 milionë euro një të arrestuari për skema mashtrimi me shtetin.
Nga ana tjetër kompania tjetër fituese ” Kupa” sh.p.k e Shkelqim Kupës rezulton se ka fituar më parë mjaft tendera nga Bashkia e Kamzës nën drejtimin e Xhelal Mziut. Gjithashtu edhe kompania tjetër fituese ”Sterkaj” sh.p.k me administrator Lulzim Sterkaj, duket se ka lidhje me Paulin Sterkaj pasi administratori i saj është kushëri me ish deputetin socialist.
Firma e katërt fituese ”LIQENI VII” është një tjetër kompani e përmendur për tendera të dyshimtë. Pronar i kësaj kompanie rezulton Ramazan Kalia. Kompania në fjalë u denoncua pak kohë më parë prej nesh për faktin se ishte shpallur fituese në një tender të dhënë nga Lefter Alla i Bashkisë Bulqizë me një vlerë rreth 80 milionë lekë më të lartë sesa firma konkurrente.
E pra, nëse dikur tenderi i dyshimtë i jepej vetëm një kompanie me historik të papastër, tashmë po u jepet një grupi të madh. Kap ça të kapësh, me pak fjalë.
