Blendi Gonxhja-n jo më kot “e ka bekuar” Zoti që të ketë këtë mbiemër. Jo për gjë, por i ka bërë "gonxhe" paratë që ka marrë nga tenderat që po ai vetë i ka dhënë vetes. Djalë i zgjuar, por jo tamam, sepse “u kap” me presh në duar. Ndoshta pak vonë, por më mirë vonë se kurrë.
Që thoni ju, Blendi Gonxhja përveçse merr rrogë si Drejtor i Përgjithshëm i DPSHTRR-së, ka në pronësi edhe kompaninë ALBARENT SH.P.K. me 100% të aksioneve. Kjo është një kompani e cila jep makina me qira.
Por si ia ka dhënë Blendi Gonxhja vetes së vet tenderat do pyesni ju? Në fakt skema është mjaft amatore, por gjithsesi ka funksionuar. Ndërmjetësi mes Blendi Gonxhes dhe tenderave është firma A-T-D – ALBANIAN TECHNOLOGY DISTRIBUTION SH.P.K. me administrator dhe ortak të vetëm Nursen Metuli. Rezulton se zotëria në fjalë është mik dhe i njohur prej kohësh i Blendi Gonxhja-s madje dëshmitarët thonë se një pjesë shumë të madhë të kohës rrinë bashkë.
E çfarë pastaj, do pyesni ju? A keni prova që e vërtetoni, apo janë vetëm “llafe pazari”, siç thotë populli? Në fakt, për fat të keq të Blendit dhe Nursenit, provat janë.
Kështu, kjo makinë që shikoni në foto është publikuar në faqen në facebook të kompanisë A-T-D – ALBANIAN TECHNOLOGY DISTRIBUTION SH.P.K. dhe ka targën AA 778 JH. Lehtësisht në foto dallohet edhe logo e kësaj kompanie.
Në bazë të disa dokumentave të këtij mjeti të cilat janë siguruar ekskluzivisht nga JOQ Albania, si dhe në bazë të të dhënave të shasisë, rezulton se kjo makinë është në përdorim nga ALBARENT SHPK që është në fakt edhe firma në pronësi të Blendi Gonxhja.
Kompania A-T-D – ALBANIAN TECHNOLOGY DISTRIBUTION SH.P.K., siç e kemi publikuar dhe më parë, është një kompani e cila merret me sistemet GPS të gjurmimit të makinave.
Rezulton se kjo kompani në vetëm 5 vitet e fundit ka fituar rreth 6 milionë euro tendera, mes të cilave nga OSHEE, UKT, AKSHI, ministri të ndryshme, Dogana, bashki të ndryshme dhe ëmbëlsira për në fund, edhe nga vetë Agjensia e Parqeve dhe e Rekreacionit, drejtor i së cilës ka qenë pikërisht Blendi Gonxhja për periudhën tetor 2015-nëntor 2018.
Pra këto tendera i ka bërë po Gonxhja që të fusë po vetë lekët në xhepin e tij, e që duke gjykuar nga shifrat duhet të jetë vërtetë i stërmadh. Epo bravo Blendi, vetëm aman lidhi gonxhet e lekëve mirë, se mos fryn erë e të fluturojnë nga dritarja.
