63 ditë me Covid-19/ Deputeti Alimadhi ende me oksigjen edhe në shtëpi, tregon rezultatin e skanerit

Deputeti i Kuvendit të Shqipërisë, Adriatik Alimadhi, i cili është një ndër personat e konfirmuar me Covid-19 në Shqipëri, ka deklaruar se ka rreth 63 ditë i infektuar.

Në një lidhje me Skype në emisionin "Open", Alimadhi tha se ka qëndruar 49 ditë në spital dhe ndodhet aktualisht prej 14 ditësh në regjim shtëpie.

Teksa foli për gjendjen e tij shëndetësore, deputeti tha se pas skanereve rezulton që mushkëria funksionon në 70% të saj, por shtoi se është akoma me oksigjen.

Ai tha:

Kam qëndruar 49 ditë në spital dhe tani në 14 ditë në regjim shtëpie. Në total i bie diku rreth 60 ditë i infektuar. Pas skanerave të bërë rezulton që mushkëria funksionon në 70% të saj. Jam akoma me oksigjen.

Më tej, Alimadhi bëri një deklaratë të fortë, teksa tha se edhe në spital bëhet politikë.

Ai tha se vetëm kur rasti i tij u bë publik u kushtua një vëmendje e madhe, ndësa tregoi se ka pasur të afërm që kanë telefonuar 127 dhe u kanë thënë që të marrin paracetamol nëse kanë temperaturë, ose të pinë çaj nëse kanë dhimbje fyti.

Deputeti shtoi:

Në spital bëhet politikë. Kam telefonuar në 127 dhe nuk janë marrë masat e duhura. Vetëm kur e bëra publike rastin u kushtua një vëmendje më e madhe. Kam persona në fisin tim që kanë telefonuar 127 dhe u është thënë, në qoftë se keni temperaturë merrni një paracetamol, ose keni dhimbje fyti, pini çajra etj. Nuk u bë një studim për këtë rast. Prandaj them unë se bëhet politikë.