Kohët e fundit në vendin tonë janë shtuar shkeljet ligjore nga shumica e popullsisë, përqindja më e madhe e të cilës përbëhet nga shtresa e grupeve në nevoja socio-ekonomike.
Për këtë arsye shteti është i detyruar që të marrë masa ndëshkuese dhe disa prej tyre t'i vendosë në paraburgim.
Por, sipas Komitetit Shqiptar të Helsinkit, kjo i krijon një kosto mjaft të lartë shtetit shqiptar, pasi nga studimi rezulton se kostoja ditore e një të paraburgosuri në vitin 2019 ka qenë 2.910 lekë.
Ndër të tjera në raport thuhej:
Paraburgimi, kur nuk respektohen standartet ndërkombëtare dhe legjislacioni ynë i brendshëm (Kodi i Procedurës Penale), përveç se rezulton me shkelje të të drejtave dhe lirive themelore të njeriut ka gjithashtu një kosto tepër të lartë për buxhetin e shtetit. Kostoja ditore e shpenzimeve për mbajtjen e një të paraburgosuri në sistemin tonë penitenciar gjatë vitit 2019 është 2,910 Lek të reja. Kostoja totale financiare në buxhetin e shtetit, për akomodimin e personave të paraburgosur në vendin tonë për vitin 2019, paraqitet në nivele të larta, përkatësisht rreth 2.29 miliard Lek (të reja).