Ish-ministrja dhe ish-deputetja e Partisë Socialiste, Arta Dade, e cila konsiderohet si një nga figurat më të shquara të kësaj force politike që prej themelimit të saj, ka folur në lidhje me situatën në partinë ku ajo u zgjodh disa herë si përfaqësuese e popullit në Parlament.
E ftuar në "A-Show" në Syri TV, Dade tha se çdo gjë është kthyer në "One Man Show", ku Rama vendos për çdo gjë, si në qeveri ashtu edhe në parti.
Ajo e krahasoi kryeministrin Rama me një "skemaxhi të vogël, që punon me skema të dalë boje".
Dade u shpreh:
Pikë së pari, sot për sot, dhe pas Kongresit nuk ka ndodhur asgjë. Si në parti, si në qeveri vendimet i merr vetëm një njeri. Ka një sheklje të çdo norme dhe parimi demokratik, siç ndodhi edhe gjatë pandemisë. Vendimet i merr kryeministri. Po tha ai bëhen gjërat, po tha ai nuk bëhen. Është një 'one-man show'. Kur ndodh në qeveri, mendoni çfarë ndodh në parti. Çështjet e gruas i dominoi bashkëshortja e tij. Punë skemaxhinjsh të vegjël, me skema të dalë boje. Mendja funksionon me disa skema që nuk janë të përshtatshme dhe nuk janë të kohës duke harxhuar kohën dhe vetëm me këto gjëra merret kryeministri.
E pyetur për Taulant Ballën, sekretarin e përgjithshëm të PS, senatorja e së majtës u shpreh:
Nuk ka shpresë që ajo parti të bëhet. Është një dramë e madhe pasi ka qenë një parti e madhe që i ka dhënë vendit qeveri normale. Me njerëz që bashkoheshin në qeveri për ti shërbyer vendit. Pas skemave piramidale u ngritën 17 banka private, erdhën investimet. Me plus minuset e veta u ngrit një model qeverisës.