E mbani mend Gjushin mo? E mo, ai tipi që ia hodhi paq pas tërmetit në Durrës? Si e kishte dreqi? Ah po, Vangjush Dako. Ky tipi ka qenë kryetar i bashkisë i qytetit në fjalë.
Po ua kujtojmë këtë, thjesht duke patur në mëndje shprehjen “çudia më e madhe 3 ditë zgjat”. E në fakt aq duket se zgjati dhe çudia e rrëzimit të pallateve në Durrës për shkak të ndërtimeve të dobëta e lejeve pa kriter që kishte lëshuar Gjushi. Edhe sot e kësaj dite, zotëria vazhdon të jetojë i qetë pa i hyrë gjemb në këmbë. Nejse.
Siç të gjithë durrsakët e dinë, nofka e tij është Gjush betoni. Kjo sepse kompania e betonit të tij ka betonizuar të gjithë Durrësin dhe jo vetëm. Ndër të tjera Gjush betoni u përfol shumë edhe për projektin e Velierës, ose e betonizimit të një ndër pjesëve më të vyera nga pikëpamja arkeologjike të një ndër qyteteve më të vjetër në Europë.
Projekti me një vlerë rreth 6 milionë USD pati kundërshti të forta nga aktivistët pasi do të betonizonte një zonë e cilësuar si thesar i vërtetë arkeologjik dhe e klasifikuar si zonë arkeologjike “A”. Në fakt firma e cila mori të drejtën për të ndërtuar projektin e Velierës është “EVEREST” me administrator Sokol Çupi.
Rezulton se kjo kompani ka përfituar përsëri nga bashkia Durrës plot 850 milionë lekë të vjetra shtesë për tenderin me objekt ““Shtesë kontrate “Rivitalizimi i sheshit publik para hyrjes së portit L.I””. Procedura prokurimit është me negocim dhe pa shpallje paraprake të njoftimit të kontratës. Vlen të përmendet se gjithashtu kjo kompani ka ofruar vlerë të barabartë më fondin limit, pëkatësisht 84’981’120 lekë të reja.
Përveç kësaj, nëse hulumton të dhënat publike, shikon se vetëm në 5 vitet e fundit kjo kompani ka marrë mbi 14 milionë euro tendera nga institucionet publike. Jo keq apo jo? Epo, s’na mbetet tjetër veçse t’i urojmë që “t’i hajë gëzuar” edhe këto 850 milionë të tjera shtesë!